(آنه أحلامي بسيطه)    عمار سلمان عبد الامير الجرجري*     آنه أحلم كون ما امد ايدي إلّه بجيب إيدي وكون دمي يدور مو بس ابوريدي كون انام وعندي دين وكون أصحه الصبح ماعندي ادين آنه أحلامي وامانيي بسيطه.... آنه كل امنيتي واحد يقره يم راسي العديله من امــــــوت ومن اموت.. كون اموت ابّيت ملكي.. ملكي وحدي حَتّه لو أبنيه ابخيط العنكبوت من اموت.. كون إبني ايعيش.. بَس ايعيش إبني.. آنه مادنكت راسي حتّه راسي ايصير اساسي وحتّه عالي ايصير إبني ومايدنِك يوم راسه آنه آحلامي بَسيطه.. آنه أحلم كون احِب النّاس كِله..  كِله حَتّه المايحبني كون ما أكسر غصن احتِمال ايشيل وَرده حتّه لو هو كِسَرني كون اصيرَن عين غيري.. ليل غيري.. جَرح غيري.. كون اصيرَن آنه غيري.. حتّه لو ماصار غيري كون اشارِك كل ضَمير وما يشاركني ضَميري حتّه ما أخسَر ضَميري كون أحلَــــم آنه صار سنين ماحالِم حِلــم والسنين سنون ذيب التّاكِل براس الزّلم آنه آخر مَره بيه اتحَلّمت جَن آنه أحلَــم وجَنّي شايل كاس بيدي نصّه الاول من دَمع والثّاني مِن دَم بينهِن بَرزخ مَحنّه لاهو نار ولاهو جَنّه فسرولي الحلم كالو لوتِسافَِر لو تموت آنه كلت الموت سَفره وبعتقادي الموت نوع من السكوت يعني كلّ النّاس مَيته وآنه ما أحتاج إذا اموتن خريطه لأن أحلامي بسيطه آنه أحلامي وأمانيي بسيطه   *الشاعر عمار سلمان عبد الامير الجرجري من شعراء قلعة سكر