جواد القابجي - لندن   ((  إنتخاب  و  صعاب  ))   كثر ما صاب الشعب ظُلم اوعذاب هوايه صاحت مانريد الإنتخاب *********** اشبعنه جلمات او خطب رنّانه اوكَام واحدنه يِحِن للعانه وشيخ جامعنه فقد إيمانه اوصار علدولار يكَلبها كَلاب *********** عاف ربّه اوشوف مدري المن تبع كَِلنه ميخالف اوهم يمكن شبع اشرس امنلوحش تاليها طلع او على الفقره اتنمَّر او شن الحراب ************* شوف عملات اوقهر من هلزمان من بعض نوّاب وسط البرلمان  كَُوم هلهل ياشعب ماكو أمان تنتخب  ما تنتخب  باقي  الخراب ************* فكر ما عنده ولا درس او فهِم يشيل اصبعه اموافج ابلايه عِلم موش هَمَّه الشعب دولار المهم هُمَّه ذوله الفتحَوْ اعلينه الارهاب ************** يا ظلم ظل ماشي ابدرب الشغب تجمعون افلوس وبليَّ تَعب وين تتجهون لو فَزْ الشعب إخذوا خبره من كَبلكُم يا دواب ************ خمس ست مرّات سوّيتو الحجيج الحجَّه إلكُم والحمايه والصِديج شهوة الدم بالنفس كلسا تهيج ومن قُدس إيمانكُم قطع الرقاب ************* هاي شيسمُّوهه هم خدمة  وطن ؟ خير  مابيكم او زدتّونه  محن انسوّي كَِلتو اعراقنه جنَّة عدن تالي كل ازماطكم أصبح ســـــــــــراب ************************* jwadalkabchi@yahoo.de