(( چلمه .. چانت إحتلال ))   جواد القابجي بين ليله اوضحه ضاعت چلمه چانت .. إحتلال شلون گلبوها للآيه او إلمن انوجه السؤال ******* موعجيبه الجاي هَمّه اتخرخش جيوب الحبايب هذا مو للوطن حُبّه يريد كرسي ايصير نايب عينه علدولار تربَه لا وطن لاشعب خايب وين رحنه وين صرنه الوطن تحتلّه الانـــــــــذال ******** للمجالس صرنه فرجه للسلب صار العمل بعد إلمن ننخه نرجه صادروا حتى الأمل الچان حافي صعد بُرجه نِسَه من جانه ابسِمَل بالدفاتر صار نهجه او للشعب ماكو مجال ********** آه يعضاء المجالس وين چا عهد المُبين شو لهيتوا بالمحابس والأبطال امزيِّفين راح چم فارس او فارس وسفه يا تعب السنين المشكله محرم او حارس يا وطن وين الابـــــــــــطال ********* چان مُحتَل صار اخونه اوبيده حل المعضله يا وطن والله انسبينه صرنه بِيد الجاهله اشلون لعبوا ذول بينه اوفقدوا ابشعبي الصله ابوصله گطمه قشمرونه اشلون يو صارت اطوال ******** اشوكت يا شعبي تقرّر تشعل اشموع او تنور تكسر القيد او تحرر والقِلع من الجذور مادروا بالدنيه تصبر ++ هذا دولاب او يدور ندري وحدة شعب تثمر ثوره والظــالم .. زوال بين ليله اوضحه ضاعت ++ چلمه .. چانت إحتلال ********************* jwadalkabchi@yahoo.de