معقوله . . .؟ سامي عبد المنعم   معقوله . . .؟ الى صديقي الوحيد في الغربه هاشم فاتح الصالحي { ابو سمير } ولك معقوله هاشم مات اخاف ابچي عليه وتفرح الشمات كلشي البي نظيف وحلو ومصفط ارباطه وقميصه وهيبته .. وسوالفه الحلوات ما يعرف ايچذب ولا فد يوم شفته ايمارس الشينات يتونس اذا ينخا عراقي ويقبل ايساعد بلايه اشروط بس لازم الموعد والوكت مظبوط يلبس قوط ينزع قوط الشوارع تكتمل بيها الاناقه من يمر هاشم هاشم ما ايحب ظالم ولو شميت ريحة وطن صافي گول اجه هاشم هاشم طيبته اتغطي الوطن واتزود هاشم ينتمي للدنيه كلها وبلايه احدود صدگ بردن اچفوفك والشمع ذاب صدگ ورد القميص التف بالتراب بعد ياهو اليصبحني ويمسيني ..؟ يهاشم يا صديق الغربه .. ياعيني من دونك بعد ما اشرب الگهوه واكسرهن فناجيني كل مصباح اشوف ابهيبتك كل الشمس يمي اتنسيني اخواني وغربتي وهمي هسه اشلون اعيش وانته مو يمي ..؟ لا لا .. لا هاشم حي ابد ما مات هاشم راح يم كركوك وشبگة هيبته النجمات هاشم حي .. ابد مامات هاشم صاعد السابع سمه وايضوي على كركوك ضويات