امي   سامي عبد المنعم / المانيا / قلعة سكر امي الى امي العزيزه والى كل الامهات أمي سگتنه الصبر من يوم چنه اصغار منها عرفنه الوفه واتعلمينه اشعار الزاد ما بي طعم لو ما يجي خطار شيلتها هيبة وطن تلمض دمع واسرار ولو دارت امي ابزعل حتى الشمس تندار باصبعها محبس شذر عن الحسد والعين ولو غاب ضي الشمس امي تشع شمسين وكت المعاند صگر وبالحب حمامة بيت وفانوسنه لو طفه ابضحكتهه يضوي البيت ولو يوم اخذني السهر وي ربعي بره البيت ما يغمض الها جفن الا اذا رديت يوليدي غاب الگمر واتنطرك ما جيت وبكل بشاشه النشد بشفافها .. اتعشيت..؟ تعذرني يبني تره بالنشد لو لحيت انته طعم دنيتي وانته عمود البيت ياما حملت الصبر عند مهدك ولوليت { دللول الولد يبني دللول .. عدوك عليل وساكن الچول } ومن تنعه امي .. بواچيها اتشيب وطن ياما كسرها الوكت واتلاوت وي الزمن حته ليالي الشته من شافن امي بچن ليلة شته والگاع طين والحزن خيم عالروازين يبني يبو گلب الحنين ما بدلن گلبه النساوين