ذبلانه سامي عبد المنعم   ذبلانه طرزتك بوسه اعله ثيابي   يل ريحة بوساتك عنبر   بوسه اتضكني   وبوسه اتهدني وبوسه ..اتبوس البوسه وتسكر   احسب نجمات الگمريه   وتاهت روحي   ابظيم اجروحي   گمت اويه النجمات اتكشمر   طگن وردات ابشباچي ..   ورده .. اتلوذ ابسد الورده   واتگلها اشاه وبردانه   وانه ابعشگك ماخذني الحر   حلوات الديره ايحسدني   ويتحسرن من ايشوفني   ايضنني .. ابحبك بطرانه   ايضنن دفيانه ابحنيتك   ومن ريحة هيلك شبعانه   ما ضاگنك خوف او ملگه   ولا مر بيهن سهر الليل   ولا ضاگن چويات الفرگه   ولا مرت بيهن كل حرگه   ايضنن بس عطرك ما خذني   ومن ريحة هيلك نشوانه   مليت اتنطر بدروبك   واشتاگ اشتم ريحة ثوبك   وگلبي امشرعلك بيبانه   كل حلوات الديره اترون   اشموع ابصينيتهن ضون   بس انه .. ابجرفك عطشانه   من يوم الشح مايك عني   انه امنعتابك خجلانه ورده .. ابساجيتك ذبلانه