بيبي سامي عبد المنعم بيبي اهداء الى روح جدتي الرائعه ام رزاق وجه مثل الصبح يمطر محنه والشيله تنگط ورد چن عطر جنه شذره ابحنچها تسوه كل الشذر من گد صبرها خجل حتى الصبر آيات تقرالي من اصعد على النخله وأحوي التمر مهيوبه هيبة وطن بالعجد لمن تمر ابقوريها اهل الطرف ايشربون چاي العصر لو طلعت من البيت تلبس عباتين لمن اتصلي العصر آيات يضوي الحوش تجمع أطفال الطرف اتوزع عليهم طوش كل ما يجي عاشور تنصب قرايات والبيت حضرة نبي وامرصع ابآيات بالعيد تضوي فرح وكليچه منها اتفوح والقوري يلهب جمر ريحته اترد الروح كل جمعه وكت العصر يضون اشموع الخضر وأسألها وينه الخضر ... اتسكتني بالبوسات وتقرالي آية صبر واتمتم ابچلمات تترجه رب السمه ايمسي ولدها ابخير وتندعي لاهل الطرف بالعافيه والستر الكل واحد امنلبيت كل يوم تنذر نذر ياعيني ياجدتي معقوله اشوفچ گبر ..؟